Albin Kurti përkujton një ngjarje të rëndësishme historike

Përmes një postimi në faqen e tij zyrtare në rrjetin social Facebook, kryetari i Lëvizjes Vetëvendosje Albin Kurti, ka përkujtuar 95 vjetorin e rënies së heroit kombëtar Azem Bejta, një luftëtar i paepur kundër forcave të okupatorit serb të asaj kohe në krye me Nikolla Pashiqin.

Në vijim mund ta lexoni postimin e zotit Kurti:

“Me rastin e 95 vjetorit të rënies së Azem Bejtës, sot një delegacion i Lëvizjes VETËVENDOSJE! vizituam shpellën ku atëbotë ia fshehën trupin bashkëluftëtarët dhe ku për gjysmë shekulli preheshin eshtrat e tij.

Në fshatin Përçevë të Klinës ishim bashkë me aktivistët tanë të Qendrës sonë atje.

Më pas vazhduam për në Galicë të Vushtrrisë ku ndodhet varri i prijësit të çetave guerile shqiptare i cili për 12 vjet rresht luftoi e rezistoi kundër forcave serbe të Nikola Pashiqit.

Aty bëmë homazhe e vendosëm lule të freskëta bashkë me aktivistë të Qendrave Vushtrri e Skënderaj.

Azem Bejtë Galica ishte luftëtar i madh i Komitetit Kombëtar për Mbrojtjen e Kosovës.

Drenica, Kosova dhe i gjithë populli shqiptar e kujtojnë me krenari gjersa në historinë tonë ai ndrit me kryengritjen e tij”, ka shkruar Kurti në fund të postimit të tij. /©Kabllogrami/

Comments (0)
Add Comment