Kreu i Lidhjes Demokratike të Kosovës, Isa Mustafa është deklaruar sot rreth takimit që ka pasur mbrëmë me presidentin e vendit, Hashim Thaçi, duke bërë të ditur se i ka kërkuar presidentit të heqë dorë nga diskursi politik për korrigjim të kufijve, në mënyrë që të krijohet një ambient normal për dialog dhe të evitohet frika nga dialogu.
Mustafa në një postim në faqen e tij në rrjetin social Facebook shkruan se LDK-ja nuk do të pajtohet ne asnjë mënyrë që të dialogohet për territorin, sepse kjo qon në rihapje të shtetësisë.
Në vijim mund ta lexoni fragmente nga postimi i Mustafës në Facebook:
“Mbrëmë e takova Presidentin Thaçi në shtëpinë time. Kërkoi të më informoj, si kryetarin e partisë më të madhe politike, për kërkesat por edhe paralajmërimet për masa, shumë serioze, ndaj Kosovës, të deklaruara nga delegacioni i lartë i SHBA-së.
Ia shpreha brengosjen time dhe të LDK-së për situatën në të cilën koalicioni qeverisës e ka sjellë vendin.
Kërkova nga Presidenti që të heq dorë nga orientimi i tij dhe diskursi politik për korrigjim të kufijve, në mënyrë që të krijohet një ambient normal për dialog dhe të evitohet frika nga dialogu. Se LDK nuk do të pajtohet ne asnjë mënyrë që të dialogohet për territorin, sepse kjo qon në rihapje të shtetësisë.
Po ashtu, theksova se është përgjegjësi e koalicionit qeverisës që të gjej zgjidhje, në mënyrë që të ruhet partneriteti me SHBA-të, si aleatin tonë strategjik. Ia shpreha qëndrimet e LDK-së për dialogun dhe nevojën që para dialogut të shkohet në zgjedhje, për të siguruar legjitimitetin.
Kam vërejtur se ka pasur spekulime si dhe akuza për këtë takim (me Thaçin); disa budallenj e kanë cilësuar edhe si tradhëti. Të tillët janë injorantë e zjarrëvënës.”, ka thënë Mustafa mes tjerash në statusin e tij në Facebook. /©Kabllogrami/