Zëvendësministri i Kulturës, Boban Stankoviq ndalohet në Merdare, reagon Kryeministri

Zëvendësministri i Kulturës, Rinisë dhe Sportit, Boban Stankoviq është ndaluar sot në pikën kufitare në Merdare nga zyrtarët policorë tё Serbisё derisa kryeministri Ramush Haradinaj këtë ndalim e ka quajtur provokim të shtetit të Serbisë ndaj qytetarëve të Kosovës, pёrcjell Kabllogrami.

Kryeministri pёrmes njё statusi nё rrjetin social Facebook, ka shkruar se “Vazhdojnë provokimet dhe qasja jokonstruktive e shtetit serb ndaj qytetarëve të Republikës së Kosovës”.

Ai ka ftuar autoritetet e Beogradit që të ndalojnë presionin ndaj qytetarëve serbë që dëshirojnë të jetojnë në Kosovë.

Ky është postimi i plotё i Kryeministrit nё Facebook:

“Vazhdojnë provokimet dhe qasja jokonstruktive e shtetit serb ndaj qytetarëve të Republikës së Kosovës

Sot në pikën kufitare në Merdare, është ndaluar nënkryetari i Partisë Liberale të serbëve të Kosovës si dhe zëvendësministër në Ministrinë e Kulturës Rinisë dhe Sportit, Boban Stankovic. Ai po mbahet nga zyrtarët policorë serb pa asnjë arsye dhe në bazë të informacioneve që kemi ai po merret në pyetje nga zyrtarë të BIA-së serbe.

Ftojmë autoritetet serbe që të ndalojnë praktikat tilla të presionit ndaj qytetarëve serb, të cilët duan ta ndërtojnë jetën e tyre në Republikën e Kosovës. Kosova është shtet i gjithë qytetarëve të saj dhe ne nuk do të pranojmë që në këtë formë të frikësohen qytetarët tanë.R.H.”/©Kabllogrami/

Comments (0)
Add Comment