‘Nisma’ kundër qeverisë teknike pa zgjedhje parlamentare

Nisma Socialdemokrate nuk do të jetë pjesë e një qeverie teknike pa zgjedhje parlamentare, pasi sipas këtij subjekti politik, vendi ka nevojë për ta krijuar një qeveri te fuqishme që u bën ballë problemeve politike vendore, pas zgjedhjeve.

Kështu është shprehur, Sekretari i Përgjithshëm i Nismës Socialdemokrate, Bilall Sherifi, për EkonomiaOnline, i cili është kundër idesë se çështjet politike në vend mund të zgjidhen përmes një qeverie teknike, madje një ide të tillë e quan të pabesueshme.

“Nëse kjo qeveri ra për shkak të çështjeve të mëdha politike, pra një qeveri politike nuk arriti t’i zgjidhë çështjet politike, atëherë si do të mund një qeveri teknike të zgjidhë çështje kaq të rëndësishme politike. Kjo është më shumë se e pabesueshme që dikush të ketë një ide, që dikush përmes qeverive teknike të zgjidhë çështje të rënda politike. Ajo që mund të them sot, është se Republika e Kosovës, ka nevojë për një qeveri të fuqishme politike për t’iu qasë zgjidhjes së problemeve të rënda politike”, tha ai.

Sherifi tha se vullneti i strukturës së Nismës, është që në zgjedhje të shkojnë të vetëm si parti, teksa shprehet se të njëjtën gjë duhet ta bëjnë edhe katër partitë më të mëdha, ajo e LDK-së, LVV-së, PDK-së dhe AAK-së.

“Të gjitha partitë e mëdha duhet të dalin në zgjedhje, madje tani edhe AAK-ja e ka shpallë veten si parti e madhe, sepse është e qartë se sondazhet tregojnë një rritje të saj. Është mirë që të katërtat, 4 kryetarët e partive të tyre të dalin dhe të kërkojnë mandatin për kryeministër. Ne insistojmë që partitë të cilat kanë shpallë veten parti të mëdha, definitivisht së paku kësaj radhe të dalin të vetme në zgjedhje, në mënyrë që të shohim se kë e sheh populli si parti më të madhe sepse të gjithë kanë nga një pasqyrë që po e shikojnë veten, është mirë që tani t’i nënshtrohen pasqyrës së popullit dhe populli të na thotë se cila është më e madhja”, thotë ai.

Megjithatë, shefi i Grupit Parlamentar të Nismës, shton se çdo kërkesë për koalicion parazgjedhor me ndonjë parti tjetër do të shqyrtohet.

“Të gjitha kërkesat, ofertat, propozimet që mund të vijnë nga partitë politike do të shqyrtohen por sot, unë nuk kam autoritet të jap një përgjigje definitive sepse do të lija një përshtypje të gabuar se unë marr një vendim vetëm”.

Për Nismën, synimi do të jetë arritja e 10 a më shumë deputetëve në Kuvendin e Kosovës, shprehet Sherifi.

“Ne presim 10 të jetë minimumi dhe sado që të jetë ai plusi nuk do të ishim kundër”, përfundon ai. /©Kabllogrami/

Lexo edhe

Ky website përdor cookies për të përmirësuar përvojën tuaj. Ne do të supozojmë se jeni në rregull me këtë, por mund të zgjedhni nëse dëshironi. Pranoj Lexo më shumë