Në derbi, Prishtina e Feronikeli ndahen baraz

Prishtina dhe Feronikeli barazuan 1:1 në “Fadil Vokrri” në Prishtinë, në një ndeshje që sapo përfundoi, e vlefshme për javën e 21-të të superligës kosovare. Kështu Feronikeli e ruan epërsinë prej pesë pikëve në krye të tabelës kundër Prishtinës –ndjekësit më serioz në garën për titull kampioni, shkruan Kabllogrami.

Edhe, fitorja e Llapit kundër Gjilanit do të thotë se skuadra llapjane mbetet në garë për titull me Feronikelin dhe Prishtinën.

Prishtina shënoi në rastin e dytë, herët në fillim të ndeshjes. Leotrim Bekteshi shënoi gol të bukur me kokë duke i dhënë epërsinë vendasve në minutën e 17-të.

Kështu, pjesa e parë u mbyll me epërsinë minimale të skuadrës nga kryeqyteti.

Por, gjërat u vështirësuan për skuadrën e kryeqytetit, pasi Lorik Boshnjaku u përjashtua nga ndeshja pas kartonit të dytë të verdhë, pas rreth një ore lojë.

Vizitorët nga Drenasi e shfrytëzuan epërsinë e një lojtari më shumë në fushë dhe e barazuan rezultatin në 1:1 vetëm 15 minuta më vonë.

Kështu, Mendurim Hoti realizoi duke shpëtuar Feronikelin nga humbja kundër Prishtinës, në derbin që mbase përcakton shumë edhe në garën për titull, në Superligën e Kosovës, sot në kryeqytet.

Feronikeli vijon të mbetet lider me 49 pikë në Ipko Superligë, pesë më shumë se Llapi e Prishtina në vendin e dytë dhe të tretë. /©Kabllogrami/

Lexo edhe

Ky website përdor cookies për të përmirësuar përvojën tuaj. Ne do të supozojmë se jeni në rregull me këtë, por mund të zgjedhni nëse dëshironi. Pranoj Lexo më shumë