Kur presidenti godet ulët kryeministrin

Koment i redaksisë

Presidenti i Kosovës, Hashim Thaçi është bërë i gjallë, por vetëm përmes Facebook-ut, pas një humbjeje pa gjurmë për gati dy javë. Tash ka zgjedhur të ‘moralizojë’ duke i kërkuar kryeministrit që të dëgjojë këshillën e amerikanëve dhe ta hjekë taksën ndaj Serbisë, shkruan Kabllogrami.

Thaçi tash merr rolin e zëdhënësit të stejt-departmentit amerikan duke thënë se “Zhvillimet aktuale dhe disa nga veprimet e institucioneve shtetërore janë duke u përcjellë me shqetësim nga qeveria amerikane”, duke konkluduar se” Kjo situatë është për keqardhje”.

Më pas godet Haradinajn në stilin e tij: “Teket personale të asnjë lideri shtetëror nuk guxojnë të lëndojnë interesin tonë shtetëror dhe atë strategjik të SHBA-së për Kosovën e më gjerë. Veprimet populiste nuk guxojnë të cenojnë vizionin dhe vendimet strategjike të Kosovës”.

Pastaj Thaçi me perfiditetin e tij, nuk e dimë a kërcënon apo moralizon kur i drejtohet Haradinajt me fjalët:

“Cenimi i raporteve me SHBA-në, i kësaj aleance të shenjtë, paraqet fillimin e cenimit të shtetit tonë. Gjithashtu, as arroganca e treguar në raport me Bashkimin Evropian nuk e nderon shtetin dhe as nuk i bënë krenarë aleatët tanë dhe SHBA-në”.

Mbase s’ka faj Thaçi, sepse politikat e tij shtet-shkatërruese /si brenda dhe jashtë/ këto 10 vitet e fundit kanë bërë që të gjithë të luajnë me ne, të na nëpërkëmbin, të tregohen arrogantë e të na poshtërojnë gjithandej – me BE-në në krye. Mbase Thaçi ka qejf që ky trend të vazhdojë deri në shkatërrimin total të vendit, ngase veprimet e tij që nga marrja e pushtetit në Kosovë, emërues të përbashkët kanë pasur rolin e tij sikur të ishte zyrtar serb, duke forcuar gjithnjë pozitën e Serbisë, njëherit duke dëmtuar rëndë pozitën e Kosovës kudo në botë.

Kur u gjet dikush që vendosi t’i thotë ‘stop’ arrogancës dhe nëpërkëmbjes që po ia bëjnë Kosovës në kontinuitet që kur Thaçi mori pushtetin – që nga Serbia e kudo në botë, atëherë ai kthehet e e quan ‘arrogant’ kryeministrin që vepron me ‘teke personale’ dhe që po ‘cenojka’ e ‘lëndojka’ intersat e “miqve” dhe të Kosovës.

Thaçi do duhej ta dijë se lideri duhet të ketë përkrahjen popullore për vendimet e marura. Lideri për këtë është, që lidershipi i tij të jetë në përputhje me popullin dhe interesat e tij. Thaçi s’ka si ta dijë këtë, pasi që çdo vendim për 10 vjet e ka marrë kundër interesave të popullit të Kosovës. Dhe, kryeministri përkundër plot magësive që ka dhe që ka treguar në qeverisje këto dy vitet e fundit, në një gjë ja ka qëlluar fort /ka vendosur taksën/ dhe për këtë e ka qartur “Evropën Plakë” e disa tjerë, pasi që s’ishin mësuar që Kosova të ketë qëndrim dinjitoz në mbrojtjen e interesave të veta nën pushtetin e Hashim Thaçit.

E ky veprim i kryeministrit, BE-së mund t’i duket arrogant siç “moralizon” sot Thaçi në facebook-un e tij, por një gjë është e sigurtë: se vendimi për taksën 100% kundër Serbisë gjenocidiale – ka gjetur përkrahje të gjerë popullore në Kosovë si kurrë më parë, përkrahje të cilën Thaçi kurrë s’e ka pasur dhe s’mund ta ketë me veprimet dhe vendimet e tij në kontinuitet anti-kombëtare. Prandaj, mos është bërë xheloz për këtë në Haradinajn. /©Kabllogrami/

Në vijim mund ta lexoni të plotë statusin e Thaçit në Facebook:

“Duhet të jemi krenarë për lirinë që e gëzojmë dhe për ndërtimin e shtetit tonë. Jo shumë vite më parë, kjo ishte vetëm një ëndërr e largët. Tani është realitet i përjetshëm.

Rrugëtimi ynë ishte tepër i gjatë dhe me plotë vështirësi e sakrifica. Por, ne nuk ishim të vetmuar përgjatë këtij rrugëtimi.

Suksesi ynë historik do të ishte i pamundur pa ndihmën e SHBA-së dhe aleatëve tjerë perëndimorë. Prandaj, duhet të jemi mirënjohës përgjithmonë.

Miqësia e Kosovës me SHBA-në është e përhershme, mirëpo përkrahja amerikane nuk mund të konsiderohet e pakushtëzuar në rast se ne bëjmë gabime që i vënë në pikëpyetje interesat dhe vlerat amerikane në Kosovë, rajon dhe Evropë. Vlerat tona dhe vizioni ynë përputhen me ato amerikane.

Zhvillimet aktuale dhe disa nga veprimet e institucioneve shtetërore janë duke u përcjellë me shqetësim nga qeveria amerikane. Kjo situatë është për keqardhje. Prandaj, tani është momenti t’i respektojmë këshillat miqësore amerikane, të cilat synojnë fuqizimin e shtetit të Kosovës dhe pacifikimin e rajonit.

Teket personale të asnjë lideri shtetëror nuk guxojnë të lëndojnë interesin tonë shtetëror dhe atë strategjik të SHBA-së për Kosovën e më gjerë. Veprimet populiste nuk guxojnë të cenojnë vizionin dhe vendimet strategjike të Kosovës.

Cenimi i raporteve me SHBA-në, i kësaj aleance të shenjtë, paraqet fillimin e cenimit të shtetit tonë.

Gjithashtu, as arroganca e treguar në raport me Bashkimin Evropian nuk e nderon shtetin dhe as nuk i bënë krenarë aleatët tanë dhe SHBA-në.

Aleanca e Kosovës me SHBA-në peshon më shumë dhe është më e rëndësishme se interesi i kujtdo qoftë. HTH”

Lexo edhe

Ky website përdor cookies për të përmirësuar përvojën tuaj. Ne do të supozojmë se jeni në rregull me këtë, por mund të zgjedhni nëse dëshironi. Pranoj Lexo më shumë