Opozita në Serbi bojkoton Kuvendin

Partitë opozitare serbe filluan të hënën të bojkotojnë seancat parlamentare, si protestë ndaj asaj që ato e shohin si qeverisje gjithnjë e më autoritare të presidentit Aleksandar Vuçiq dhe partisë së tij në pushtet, Partia Progresive Serbe.

Partitë e opozitës dhe mbështetësit e tyre akuzojnë zotin Vuçiq dhe SNS se mbysin lirinë e medias dhe ndërmarrin sulme ndaj kundërshtarëve politikë apo gazetarëve në Serbi, vend që kërkon të anëtarësohet në Bashkimin Evropian, raporton “Zëri i Amerikës”.

Presidenti Vuçiq dhe partia e tij i mohojnë akuzat. Bojkoti vjen në klimën e protestave të përjavshme me pjesëmarrjen e mijëra njerëzve, që filluan në dhjetor dhe janë përhapur nga Beogradi në shumë qytete të tjera. Protestuesit dhe opozita po kërkojnë gjithashtu dorëheqjen e zotit Vuçiq dhe thirrjen e zgjedhjeve të parakohshme.

Në një deklaratë, partitë e opozitës kanë thënë se ligjvënësit e tyre do të bojkotojnë seancat plenare, por do të qëndrojnë brenda ndërtesës së parlamentit, ku do të vazhdonin të mbajnë konferenca për shtyp dhe informime deri në përmbushjen e kërkesave të tyre.

Presidenti Vuçiq, një nacionalist i njohur gjatë luftërave ballkanike të viteve 90, i cili tani është për lidhje më të ngushta me Perëndimin, ka thënë se nuk do të përkulet ndaj kërkesave të protestuesve.

Vendimi i opozitës për bojkot nuk pritet të ndalë punën e parlamentit, ku SNS dhe aleati i saj, Partia Socialiste së cilës i prinë “slloba i vockël” – krimineli Ivica Daçiq, kanë 160 nga të 250 vendet, një shumicë komode. Por bojkoti mund të minojë besueshmërinë e koalicionit qeverisës.

Sipas sondazheve të opinionit, Vuçiq dhe SNS gëzojnë mbështetjen e rreth 50 për qind të votuesve, ndërsa opozita mund të sigurojë gjithsej rreth 15 për qind. /©Kabllogrami/

Lexo edhe

Ky website përdor cookies për të përmirësuar përvojën tuaj. Ne do të supozojmë se jeni në rregull me këtë, por mund të zgjedhni nëse dëshironi. Pranoj Lexo më shumë