Dy nga tre të kërkuarit për grabitje shfaqen së bashku në Facebook ‘tuj pi kafe’

Kastriot Shala dhe Leutrim Latifi, dy persona që janë shpallur në kërkim nga Policia e Kosovës, janë shfaqur së bashku në një fotografi në ‘Facebook.

Policia e Kosovës me 16 tetor të vitit 2018 përmes një komunikate ka njoftuar se është në kërkim të tre personave të cilët dyshohet të jenë të përfshirë në disa raste të grabitjeve. Madje Policia ka ofruar edhe shpërblimin me 5000 euro pёr ata që ndihmojnë në gjetjen e kёtyre tre të dyshuarve për grabitje.

Ata kishin kërkuar ndihmën e qytetarëve për lokalizimin e të dyshuarve që sipas fotografisë janë në rahati sa për të dalë së bashku në kafene, transmeton Kallxo.com.

Në ‘Facebook-un’, e Kastriot Shalës është postuar një fotografi ku është etiketuar edhe Leutrim Latifi.

Postimin e tyre ata e kanë shoqëruar me mbishkrimin ‘E sa njeri ka ba turr, e u hi nër tavolinë si [qen]”.

Në nëntor, policia kishte njoftuar se të dyshuarit që janë në kërkim konsiderohen me rrezikshmëri të lartë dhe aktualisht gjenden në arrati në përpjekje për t’iu shmangur arrestit policor.

Sipas policisë, dy të lartpërmendurit dhe Ridvan Ademi nga Podujeva ekziston dyshimi i arsyeshëm se të njëjtit mund të jenë të implikuar në rastet e grabitjeve që po hetohen. /©Kabllogrami/