Kryeministri në detyrë i Republikës së Kosovës, Albin Kurti, priti në takim ambasadorin e Shqipërisë në Kosovë, Qemal Minxhozi, ndërsa diskutuan për situatën me pandeminë COVID-19, bashkëpunimin ekonomik e energjinë.
Në komunikatën e lëshuar për media thuhet se ata diskutuan edhe për bashkëpunimin mes dy vendeve në fushën e luftimit të koronavirusit por edhe aspekteve tjera ekonomike në veçanti.
Kryeministri në detyrë Kurti dhe ambasadori Minxhozi diskutuan poashtu edhe mbi rezultatet e masave të vendosura nga dy qeveritë dhe mbi numrin e infektimeve
Të dy bënë thirrje për kujdesin që duhet kushtuar në vazhdim dhe në vazhdimësi pasi pandemia vijon të jetë aktive.
Temë tjetër e diskutimit përgjatë takimit ishte bashkëpunimi bilateral ekonomik, rritja e qarkullimit të mallrave dhe prodhimeve, si dhe faktorët që duhet ta nxisin këtë qarkullim.
Mbi bashkëpunimin në mes dy vendeve u diskutua edhe në fushën elektro-energjetike, pas pavarësimit elektro-energjetik të Kosovës nga Serbia dhe bashkëngjitjes në Bllokun Rregullues të Sistemeve Energjetike Kosovë-Shqipëri, si dhe funksionalizimit të interkonjeksionit 400 kV në mes Kosovës dhe Shqipërisë pas më shumë së 6 vjetëve.
Kryeministri në detyrë Kurti dhe ambasadori Minxhozi u zotuan për mbështetje të plotë dhe të vazhdueshme ndaj nevojave dhe kërkesave të të dy vendeve.
©Kabllogrami