Weberi gjerman dhe Lagarde – francezja e FMN-së, në garë për kreun e Komisionit Evropian

Për t’ia rënduar punët Manfred Weberit, i cili shihet nga njohësit e proceseve në BE si njeriu më i përshtatshëm dhe më i përgaditur për ta drejtuar Komisionin Evropian, u përkujdesën të ashtuquajtuarat katër vendet e Vishegradit (Polonia, Republika Çeke, Sllovakia dhe Hungaria) të cilat u deklaruan se nuk do të mbështesin Manfred Weber për postin e presidentit të Komisionit Europian.

Ky vendim i këtyre 4 vendeve të BE-së (që i takonin dikur ish bllokut komunist), u mor pas propozimit të kryeministrit hungarez, Viktor Orban, njëkohësisht edhe lideri i partisë në pushtet në Hungari, Fidesz, e pezulluar nga Partitë Popullore Europiane.

Në anën tjetër edhe francezja Lagarde e FMN-së thuhet të jetë ndër kandidaturat për kreun e Komisionit Europian me insistim të presidentit francez, që e do njeriun e vet në krye të këtij komisioni.

Drejtoresha e përgjithshme e Fondit Monetar Ndërkombëtar, Christine Lagarde pohoi sot se ndihej vërtetë e vlerësuar që bënte pjesë në mesin e emrave të komentuar për të marrë drejtimin e Komisionit të ardhshëm Europian, ose atë të Këshillit Europian, por për momentin ishte e fokusuar në mandatin e saj në krye të FMN-së.

“Unë jam shumë e nderuar që jam bërë pjesë e kësaj liste europiane, por kam një mision, më shumë se një mision unë kam një mandat. Unë po përmbush misionin tim dhe po kryej mandatin tim në drejtimin e FMN-së”, u shpreh ajo në prani të gazetarëve në Luksemburg.

Francezja 63-vjeçare përmendet si një shpëtim i mundshëm për kreun e ekzekutivit të ardhshëm europian ose Këshillit Europian.

Krerët e shteteve dhe qeverive të BE-së do të mblidhen javën e ardhshme në Bruksel për të diskutuar rreth këtyre kandidaturave.

Pasuesi i Jean-Claude Juncker në krye të Komisionit Europian duhet të marrë detyrën më 1 nëntor. Ndërsa personi që do të pasojë Donald Tusk në Këshillin Europian do të marrë përgjegjësitë e reja më 1 dhjetor/AFP. /©Kabllogrami/

Lexo edhe

Ky website përdor cookies për të përmirësuar përvojën tuaj. Ne do të supozojmë se jeni në rregull me këtë, por mund të zgjedhni nëse dëshironi. Pranoj Lexo më shumë