Është arrestuar avokati Gazmend Halilaj për rastin e të miturës në Drenas, bën të ditur Inspektorati Policor i Kosovës, përmes një komunikate për media, përcjell Kabllogrami.
Inspektorati Policor i Kosovës (IPK), respektivisht hetuesit e Departamentit të Hetimeve kanë vazhduar të ndërmarrin veprime tjera hetimore lidhur me rastin e Drenasit në konsultim të drejtpërdrejtë me Prokurorinë e Shtetit.
Lajm i lidhur: A po hapen hetime edhe për avokatin denoncues, në rastin e vajzës nga Drenasi
Në kuadër të këtyre veprimeve hetimore sot (27.02.2019) në orët e pasdites hetuesit e IPK-së arrestuan të dyshuarin e katërt në këtë rast, transmeton Koha.net.
“I dyshuari me inicialet G.H u arrestua me dyshimin se i njëjti ka kryer veprat penale “keqpërdorim i detyrës zyrtare”- neni 422, “keqpërdorim seksual duke keqpërdorur pozitën zyrtare apo profesionin”- neni 239 dhe veprës penale “frikësim gjatë procedurës penale” nga neni 395 i Kodit Penale të Kosovës”, thuhet në komunikatë.
Bazuar në aktvendimin e Prokurorisë Themelore të Prishtinës të dyshuarit G.H i është caktuar masa e ndalimit për 48 orë deri në vazhdimin e procedurave tjera sipas Kodit të Procedurës Penale. /©Kabllogrami/